Tapang, Lakas ng Loob at Kumpiyansa

Maliwanag na maliwanag kung ano ang nasa loob ng puso at isipan ng TV5 CEO Christopher Sy at ang iba pang mga taong nasa likod ng pagbabagong-bihis ng channel 5 (na ngayon at TV5). Bagamat malaking pera ang ipinuhunan ng TV5 at sa tulong na rin ng MPB Primedia, Inc., kasama dito ang tapang na harapin ang malalaking TV networks na ABS-CBN 2 at GMA 7… ang lakas ng loob na tapatan ng alternatibong mga programa ng TV5 ang mga tradisyunal na mga TV shows ng ABS-CBN 2 at GMA 7… at ang kumpiyansa na susuportahan ito ng target nilang mga manonood – ang kabataan… isang bagay na sang-ayon naman ang sambayanang Pinoy anime fans.

Ayon sa kanilang advertisement na kasalukuyang ipinapalabas sa TV5, alam ng TV5 kung ano ang gusto ng mga kabataang manonood ng telebisyon ngayon. Kaya mula noong August 9, 2008 ay ibinibigay ng TV5 ang kung ano ang gusto ng mga kabataan, kung saan nila ito gustong panoorin at kung paano nila ito gustong panoorin, isang malaking bagay na hindi, walang kakayahan o walang balak tugunan ng mga malalaking TV networks.

Anu-ano nga ba ang mga naging pagkukulang (o sabihin na nating kasalanan) ng mga malalaking TV networks sa sambayanang Pinoy anime fans? Maliwanag na hindi tinutugunan ng ABS-CBN 2 at GMA 7 ang mga panawagan nating muling maglagay ng anime sa afternoon schedule. Ito ay sa hinalang may mga empleyadong binubulungan ang mga namumuno sa Entertainment o sa Foreign Programs Acquisition at inuudyukang huwag nang magpalabas ng anime sa hapon o di naman kaya ay bumili na lamang o mag-dub at magpalabas ng mga Asianovelas sa mga timeslots na sa pananaw ng sambayanan ay dapat sa anime.

Dito papasok ang anggulong nagtataksil na ang mga malalaking TV networks sa kanilang mga manonood. Kung malaking bagay sa kanila ang anumang feedback mula sa kanilang mga manonood, paano nila ipapaliwanag ang mga kasong hindi nakakarating sa mga kinauukulan ang mga tawag sa telepono, ang mga padalang snail mail o kahit sa pagpapadala sa e-mail na humihiling na maglagay ng anime sa afternoon schedules? O kahit mga feedbacks mula sa kanilang online forums ay hindi ginagawa ng paraan ng mga forum administrators at moderators para maiparating ito? Paano naman nila ipapaliwanag na ang mga ipinagmamalaki nilang anime acquiition (kung meron man) ay hanggang sa mga panahong ito ay hindi pa rin nila maipalabas sa kanilang mga channels? Isang halimbawa nito ay ang balitang nakuha ng GMA 7 ang Death Note na hanggang ngayon ay wala pa ring petsa kung kailan ito unang maipapalabas. Pinangangambahan ba nila ang nilalaman ng anime na ito? Kung gayon, bakit ang Shakugan no Shana sa TV5, nagawa nilang ipalabas ito sa kabila ng umano’y sensitibong nilalaman nito? Dito papasok ang mga mabigat na katuwiran ng TV5… may tapang na ipalabas ang naturang anime na ito, upang ipakita kung ano talaga ang nangyayari sa buhay ng isang teenager na suportado naman ng fictional at fantasy plots… may lakas ng loob na ilagay ito sa timeslot na bagay na ginawa na rin ng GMA 7 at ABS-CBN 2 ilang taon na rin ang nakalipas… may kumpiyansa na tatangkilikin ito ng sambayanang Pinoy anime fans.

Oo nga’t ang kapwa ABS-CBN 2 at GMA 7 ay may pangalawang channels (Studio 23 at QTV 11), pero pareho ding hindi tinutugunan ng kanilang mga “alternatibo” ang gusto ng mga kabataan. Nagsisimula na ring magpakita ng kapabayaan at kasalanan ang QTV 11 sa kanilang anime programming, lalo na sa hapon. Lubha nga namang nakakapagtaka ang Mondays to Wednesdays scheme ng QTV 11 sa kanilang anime programming. Ito ba ay dahil sa kanilang Matinee block?

Kung gusto ng ABS-CBN at GMA na tangkilikin sila ng mga youth viewers, maliwanag ang kanilang dapat gawin…tularan ang ginagawa ng TV5 para sa sambayanang Pinoy anime fans. Dapat nilang itanim sa kanilang mga kukote na hindi lang dapat alalahanin ang malaking perang kanilang pupuhunanin o kikitain kundi ang kasiyahang ibibigay nila sa mga kabataang manonood nito.

TV5: The Week That Was

August 9, 2008. Saturday. Mga bandang 8:00 to 9:00 pm, napanood ko ang teaser ng TV5 kaugnay ng kanilang programming para sa mga kids at youth. Sinasabi nilang 32% ng total population ng Pilipinas ay binubuo ng youth. That’s why TV5 gives these viewers WHAT THEY WANT, WHEN THEY WANT IT and HOW THEY WANT IT.

Buong umaga (6:00 am to 12:00 nn) ay inilaan sa mga animated shows. Tatlong oras dito ay sa Nick on TV5 block. Tuwing 11:30 am to 12:00 nn naman ang Transformers: Armada, na una nang napanood sa GMA 7, QTV 11 at Hero TV. Walang takot na tinapatan ng anime na ito ang Pinoy game show ng ABS-CBN 2 at ang hindi mamatay-matay dahil hindi pinapatay na mortal enemy ng anime programming na matanda nang bida sa 14 na taon nang ginawang telenovela na palabas pa rin sa GMA 7.

Mula nang alas-4:30 hanggang alas-7:00 ng gabi, para pa rin sa youth ang naturang timeslots. Tagalog-dubbed ang Nick on TV5 mula 4:30 to 6:00 pm. At ang isang oras naman ay ipinangalang “PrimeTime Anime”. Buong sambayanang Pinoy anime fans ay tumutok sa Shakugan no Shana at Yamato Nadeshiko, kung saan ang mga dubbers nito ay dinala ang galing at talento hanggang TV5. Buong tapang na hinarap ng 2 anime na ito ang mga gameshows nina Kris Aquino at Arnell Ignacio at ang unang 30 minuto ng kanilang TV newscast.

Aaminin kong mula nang mawala sa afternoon slot ang anime, napipilitan akong manood ng mga gameshows sa gabi. Pero nang bumalik ang anime sa TV5, na-realize kong wala akong panalo sa panonood ng mga ito. Kung manonood lang ako pero wala naman akong mapapanalunang pera, bakit pa ako manonood? Hindi kataka-taka kung mababa ang narehistrong ratings ng mga ito. Hindi lahat ng 15% ng mga nanonood ay naglalaro kasabay nila.

Kaya tayong mga anime fans, kaysa aksayahin lang natin ang 30 minuto sa gameshows at 30 minuto ng panonood ng mga balita na hatid ay problema at walang kasolusyonan, manood na tayo ng PrimeTime Anime block ng TV5. Pantay-pantay tayong maeentertained.

Muli, ang aming hamon sa ABS-CBN at GMA. Ang mga pinuno ng Entertainment department at maging sa Foreign Programs Acquisition department ay malinaw na walang ginagawang aksyon sa mga panawagan ng mga anime fans na muling maglagay ng anime sa afternoon schedule. Ito ay dahil sa nagpapaimpluwensya sila sa mga bulong ng ilang empleyado, nag-uudyok na huwag nang magpalabas ng anime sa hapon at sa halip ay magpalabas ng mga Asianovelas.

Malinaw na nababahag ang buntot ng mga nasa Entertainment at Foreign Programs Acquisition department ng mga TV networks na ito. Kung magkaroon nga naman ng pagkakataon na magpalabas ulit ng anime sa hapon, pipiliin pa rin nilang magpalabas ng mga gasgasing animes kaysa magpalabas ng bago pero makokompromiso naman dahil putol-putol ang mga eksena. Magreresulta ulit ng ito ng muling pagkakatanggal ng anime sa hapon.

Maayos sana kung ang mga feedback ng mga katulad naming mga fans ay nakakarating sa kanila. Pero nababalitaan kong nakatambak ang mga phone-in feedbacks, mga snail mails, maging ang mga e-mail messages ay hinaharang kapag anime ang topic.

Hanggang patuloy ang iregularidad, katiwalian at pagmamaltrato ng mga higanteng TV networks sa anime programming, patuloy ang aming panunuligsa at pagbatikos sa kanilang mga maling gawain.

Para sa TV5 – hanggang patuloy ang magandang simula ng pagbabalik ng anime programming sa inyong channel, ang buong suporta naming mga anime fans ay laging nasa inyo.